علاش يا دُكْ.

في كل مرّة يتحدث، نسمعو ونسكت. مهما يكون الرّاجل عندو سوابق باهيّة وخير من برشة ناس، لكن اليوم كثّرلها بصراحة..

شنيّة معناها يا سي المنصف يتعزل الرّئيس ويتحاكم ونعملو إنتخابات جديدة لرئيس جديد؟.. تحب تقول نرجعو لماقبل 25 جويليّة ويرجع عاد الخمج اللي كنّا عايشينو .. ماهو هذا هو، مافيش غيرو.

حسب رايك كيف يصير اللي قلت عليه المافيات ماش تتوب وترجع لربّي وتخطانا؟..

خسارتك سي المنصف وربّ الكعبة.. موش كنت راكش من وقت خروجك من الرّئاسة ولا حس ولا خبر والبلاد وقتها كورة بين رجلين الذّكورة وبكلّها جروح وبياسات، آش حك شعيرك اليوم.

أنا شخصيّا ما لقيت كان تفسير واحد للهرجة اللي قايم بيها هالأيّامات.. تحب ترجع رئيس من جديد..

حقّك، لكن ماتنساش اللي "شعب المواطنين" ما إختاركش من جديد عام 2019 وإذا هالمرّة معمّل على "شعب المافيات" اللي تحبّهم يرجعو فعلى الدّنيا السّلام.

عمري ما كنت نتصوّر روحي في هالموقف ونكتب عليك في هالكلام، لكن الله غالب، تونس أغلى منّك ببرشة وما كنت نساند فيك قبل إلاّ من أجل هالبلاد.. وبرشة كيفي.

وماتقلّيش اللي إنت "ديمقراطي" وتحارب في الإستبداد، لوكان صحيح راني هالكلام نقلّك فيه على صفحتك في الفايسبوك اللي مسكّرها في وجوهنا وتغنّي فيها وحدك وجناحك يرد عليك.. وماتقلّيش كيف ماقال غيرك أنّك مسكّر التعاليق تجنّبا للشّتم والتّجريح، هذه لا تنطلي، برشة يشتمو ويجرّحو فيك في برشة صفحات وكيف مامطنّشهم غادي طنّشهم على صفحتك وخلّي المجال مفتوح للي يحب يناقشك وصفحتك يا دكتور ميش مقدّسة لها الدّرجة، ميش مقدّسة أكثر من المسجد النّبوي اللي كيف تبوّل فيه واحد وحبّو الصّحابة يعاقبوه ويخرّجوه قاللهم الرّسول عليه وعلى آله الصّلاة والسّلام: "أتركوه ليتمّ بولته، ﻭﺃﺭﻳﻘﻮﺍ ﻋﻠﻰ ﺑﻮﻟﻪ دلواً ﻣﻦ ﻣﺎء، ﻓﺈﻧّﻤﺎ ﺑﻌﺜﺘﻢ ﻣﻴﺴّﺮﻳﻦ ﻭﻟﻢ ﺗﺒﻌﺜﻮﺍ ﻣﻌﺴّﺮﻳﻦ".

مالا خلّينا في همّنا ومادام لا إنت ولا غيرك ماللي وصلو للسّلطة مانجمّتوش تغيّرو شئ، خلّي غيركم يجرّب وإستكفاو برواحكم ولا ترموا بأنفسكم للتّهلكة.