غنانيش ويا مدراك.

 قوم "الإنقلاب" بصراحة بصراحة ناقصين برشة في كتابة السينياروات..

إقتحام منزل فلان الفلاني وإقتياده لوجهة مجهولة.. هكّة.. معناها الأمن كيف يعتقل فلان الفلاني كيف مايمكن يهزّوه للمركز ممكن يهزّوه للشيراطون وإلاّ لدحدح.

رغم حراسة أفراد عائلته وإعتنائهم به بصورة دوريّة، خطف فلان الفلاني وإقتياده لجهة مجهولة (كيف العادة).. مالا، ومن غير حس ولا شوشعة ولا خلعان بيبان وأفراد عايلتو العسس مافاقو كان الصّباح بعد ما شربو قهاويهم.

خطف فلان الفلاني من قدّام المحكمة بسيّارة كراء ولابسين شوارط وكيف العادة إقتادوه لجهة مجهولة.

إقتحام مقر قناة الزّيتونة من طرف الأمن والهايكا وكسّرولهم ماعون الخدمة.. لوكان قالولنا كسّرولنا خليقنا رانا صدّقنا.

إلخ.. إلخ.. كلخ.

هوما معذورين راهم.. قيسون ماعطاهمش الفرصة للتّربّص ماكانش راهم عملو حصص تعليميّة عند أسامة أنور عكاشة وطلّعولنا حلقات تعمل الكيف نربحو بيهم زايزة في كان وإلاّ البندقيّة.

هاكا حال اللي ضيّع عمرو في "النّذال" وما خمّمش في مستقبل حياتو وكوّن روحو على قاعدة على خاطر التّعليم الغنينشي ما عندو وين يوصّل،عجل وعبدتوه تحسابوه راجل طلع طاصة في ماجل وما يخرّج كان "الخَلايق".. وبالمكشوف.

وربّي قال: " يَٰقَوْمِ إِنَّكُمْ ظَلَمْتُمْ أَنفُسَكُم بِٱتِّخَاذِكُمُ ٱلْعِجْلَ فَتُوبُوٓاْ إِلَىٰ بَارِئِكُمْ فَٱقْتُلُوٓاْ أَنفُسَكُمْ ذَٰلِكُمْ خَيْرٌ لَّكُمْ عِندَ بَارِئِكُمْ".