مجرم حرب.

 

كلّ عام وإنتم بخير كان خلاّوكم الصّحاح.. الكورونا الأولى ضربت كبار العمر وهزّت ماهزّت ويقولو وموش غريب اللي ثمّة شكون فرحان من اللي صار على مبدأ مصائب قوم عند قوم فؤائد ومن هالفرحانين صناديق التّضامن الإجتماعيّة اللي إرتاحت من برشة دفعان للمتقاعدين.

حكومتنا السنيّة اللي ماقدرت تعمل شئ في أيّ مجال ضربت خماسها في سداسها وقالت علاش كان السي آن آس آس تفرح وقرّرت هي زادة تنقّص من ضغط الشّباب البطّال علاها وطلعت بطلعة تلقيح الشّباب النّهارين الأولالين من العيد في مراكز يتعدّو عالصّوابع في كامل تراب الجمهوريّة.. وألحق ياللي تلحق.

لمّتهم الكل كاسي وعريان وبعد ما تزاحمو وتلاصقو وإتدازّو لقحت لخمسة كعبات وقالتلهم هاكا حد الجهد، ماعادش تلاقيح، برة روّحو.. اللي لقّح صحّة ليه واللي مالقّحش أكيد راهو تلقّح من دزني وندزّك وشدني ونشدّك وأهلا بيك وعالسّلامة وعيدك مبروك وإنت بالأمثل.

حكومة عباقرة والشّاهد ربّي لكن باقي فيها نقص، علاش ما كملتش جميلها، وهي صرفت صرفت، وفرقت عالشّباب اللي حضر لكل واحد كفن يهزّو معاه على ماياتي..

والطّين، مايزّيش طين، يزيد يسقيه الـ💩 رئيس الحكومة  ويطلع بلا حشمة ولا جعرة ويقول: "مافيباليش، وهاني صلّحت الغلطة ونحّيت وزير الصّحة" (هذا اللي فهمتو من كلامو بالعربي، بقية الكلام بالفرانصيص وما فهمت منّو شئ).

الله الله، العالم الكل في بالو قبل ثلاثة أيّام وحضرة الـ💩 مافيبالوش.. وحتّى لوكان نتبوهلو ونصدّقوه، هو موش رئيس للحكومة وموش هو المسؤول عليها وعلى كلّ الوزارات وموش هو رئيس اللجان الكلبة الكلّ متاع الكوفيد وغير الكوفيد.. إذا كان ما فيبالوش يتحمّل مسؤوليتو ويمشي ينتحر ما دامو مسيّب الماء عالزّرع وطلع هو هاك الأطرش اللي في الزّفّة.

هو موش قال عاللي صار أنّو "آكت كريمينال" (ترجمتها بقوقل طلعت "فعل إجرامي")، وإحنا موش في حالة حرب على الكورونا؟.. معناها وبصيفتو مسؤول على البلاد والعباد والمسؤول الأوّل عاللي صار يلزموا يتحاكم كمجرم حرب..

وياريت تكون محاكمة عسكريّة.