الخميس 29 جويليّة 2021.

الرّئيس كيف طلب من التّجّار يهزّو يديهم شويّة عالمواطن موش معناها يستجدي فيهم.

رئيسكم، وعندو عام ونصف، عجب، لتو ما فهمتوه؟.

الرّئيس "الأوحد" (هاذي نكاية في الخرنانة بتوع الإنقلاب) يبدأ بالنّصيحة ثمّ التّهديد.. ثمّ الهراوة فردّو بالكم.

ردّو بالكم فيسع، الوقت ضيّق وموش ماش يصبر عليكم كيف الفسّاد متاع المال والسّياسة.

وياريت لوكان يقع التّراجع على تحرير الأسعار متاع الرأسماليّة المتوحّشة ونرجعو لتحديد الأسعار بصفة شاملة، على الأقل في هالفترة الحرجة، لين البلاد توقف على رجليها، ويكون القرار مقرون بمراقبة صارمة وعقوبات رادعة..

_________________________

الغنينيش في الرّمق الأخير قال إنّو مستعد للتّنازل، المهم ترجع الدّامـGـراطيّة.

هكّة يا شخشوخ، نسيت حويجة ما فسّدتهاش تحب ترجع تفسّدها ؟

وإلاّ طيّبك رزام الإخشيدي كيف ما طيّبك قبل رزام البجبوج.

ماك متعوّد دايمااااا.. يا قرنيطة.

لكن هالمرّة دوّيوو.. البجبوج طيّبك باش يتحالف معاك على خاطركم الإثنين فرد قصعة، لكن الإخشيدي راجل.

_________________________

راشد فرزيط راشد كان عامل فيها راGل ويتطاول على أسيادو.

الرّجوليّة، كي تكون رجوليّة، تحضر وتغيب، آش بالك كي تكون فشوش.

اليوم الفرزيط، اللي كان عامل صيد، ولاّ جربوع ومتخبّي في الرّوGارات.. ببركات الشخشوخ.

موش هاذا المهم..

هالمخلوق كان يتّهم في قيس سعيد بأنّو عميل للزّمريكان.. واليوم يسترحم في نفس الزّمريكان (من جملة من إسترحمهم) باش يتوسّطو ويخرّجوه من البلاد.

التّفاهة ما فيها ماتختار.

_________________________

هوما توم وجيري موش يتعاركو يتعاركو وكيف تصير حاجة لواحد منهم الآخر يوقف معاه ويواسيه؟.

البعرورة متاع توم وجيري اليوم موش عاجبها تجميد البرلمان وقالت يلزمو يرجع يتسخّن وقالت اللي هي تعتبر نفسها في حالة إنعقاد دائم.

مثلا هي تو منعقدة.. وغدوة زادة تلقاوها منعقدة.

سخّفها الغنينيش متاع توم وجيري المغبونة ومالقات مع شكون تلعب.