ممكن تكون ترّاس، وممكن تكون صبيّة، وممكن تكون راجل بشلاغمو، وممكن تكون مرا بالمكياج أو بدون مكياج، وممكن تكون دولة، وممكن تكون منظّمة صهيونيّة عالميّة.
العزوزة الخرنانة متاع هالأيّام برشة ناس عايشين في بلاد وحدة وفي وقت واحد وفي أحداث وحدة.
وثمّة تخرنين من تخرنين.
تخرنين يوصّل لهدف، وتخرنين يخرّج من الملّة، وتخرنين مدفوع الثّمن.
وتخرنين بص في الهواء الطّلق، تسمع حسّو ويهزّو الرّيح..
وهذا هو تخرنين متاع هالأيّام.. الخرنانة تخرنن والمعني بالأمر شايخ وماشي من نجاج إلى نجاح وقاعد يكسب في قلوب اللي سرقوهم واللي ظلموهم واللي جوّعوهم واللي همّشوهم واللي قمعوهم واللي إغتصبولهم ثورتهم.
هاذم هوما الشّرعيّة اللي الخرنانة يقولو باللي قيس سعيظ إنقلب عليها.
وهوما مستقبل البلاد اللي الخرنانة يقولو اللي قيس سعيد ماشي بيه للمجهول.
وهوما هيبة الدّولة اللي الخرنانة يقولو اللي قيس سعيد بهذلها.
إذا قيس سعيد إنقلابي ، كيف ما تقولو، فراهو ما إنقلب كان عليكم وعلى المافيات اللي تحبّوها تبقى وتواصل نهب البلاد والعباد.. والنّاس شايخة بيه.
إذا قيس سعيد ما إحترمش الشّرعيّة، كيف ما تقولو، فراهو إحتقارو ليكم وللأوباش اللي تساندو فيهم.. والنّاس تشجّع فيه.
إذا قيس سعيد دكتاتوري، كيف ماتقولو، راهو قصفّلكم سعدكم قبل ماتنجّمو تقولو أف.. والنّاس تضحك عليكم.
معناها بالمختصر المفيد، حضرة جنابكم قاعدين تبولو في الرّمل، لامؤاخذة.
ولوكان قيس سعيد دكتاتور راكم شادّين جحوركم لا حس ولا خبر لا تسرديك.
وإحمدو ربّي حمدا كثيرا اللي جاكم قيس سعيد اللي يحترم القانون ويحترم نفسو، وماجاكمش غيرو بقادومة وفرشخكم كيف حفنة زرّازي.
لوكان كنتو رجال وعندك حس بالمسؤوليّة راكم من أوّل يوم ساندتوه، هو ماجاش بالعيب، موش تشكّكو فيه وتحاربوه على خاطر عارض الفساد ووقف في وجه التّبلبيز.. ماسمعنا منكم كان إستناو الصّندوق الجاي..
لوكان يجي ميات ألف صندوق بالحالة الموجودة مايتغيّر شئ، راهي مافيات يابابا.
صحيح الشّعب غلط كيف عاود إنتخب الأوباش لكن آش تحبّو يعمل.. كدس أوباش إختار منهم، وتحبّو الكدس يقعدد هو هو وبعد ترميو ذنوبكم عالنّاس.
صحيح الرّئيس أخطأ كيف جاب المشيشي.. كان يحسابو راجل، طلع طاصة في ماجل، وسلعة فاسدة للبيع.. إيه آش يعمل؟ يقعد يتفرّج والإتّهامات موجّه ليه.. هاونا نحّاه والإنسان خطّاء، وخير الخطّائين التّوّابين، موش كيفكم متعلّقين بالغلط ومتعنكشين فيه وتحميو فيه من السّقوط.. يا خرنانة.
كليمة عالشّرعيّة.. موش غرامكم شرعيّة؟.
الشّرعيّة ميش فقط من الصّندوق، الشّارع زادة يجيب الشّرعيّة.. وقيس سعيد غمركم شرعيّة.. من الصّندوق ومن الشّارع.
بالصّندوق 73%.. وبالشّارع، بعد قراراتو كامل مناطق الجمهوريّة.. ماشفتوش فرحة النّاس من شمالها وجنوبها..
هاكي شرعيّة وإلاّ بطّيخ، يامتعلّمين يابتوع المدارس؟.
_______________
الصّورة المصاحبة ليست وليدة مستجدّات اليوم.. هي من سنة 2019 وقت الإنتخابات.
ليست هناك تعليقات:
إرسال تعليق