الشّيطان الأكبر.

 كتبت هذه الدوينة بتاريخ 26 أفريل 2014

العدو الصّهيوني موش عدو الفلسطينيين فقط..

الحركة الصّهيونيّة ماتعترف كان بالفكر اللي قامت عليه.. الفكر العنصري الإرهابي المعادي للنّاس الكل.. حتّى لليهود اللي مايمنوش بالصّهيونيّة..

ماتقلّيش وإحنا آش دخّلنا..

وماتقلّيش إحنا بعاد جغرافيّا وما علينا سو..

سمّ الصّهيونيّة مصنوع لكلّ البشر وبالخصوص للمسلمين سواء كانو عرب وإلاّ عجم..

صحيح عصابات الصّهاينة ميش عاملة حسابها باش تغتصب الدّول الإسلاميّة الكل كيف ما إغتصبت أرض فلسطين بقوّة الحديد والنّار لاكن تحسب باش تحتلهم بالخديعة والخبث والضغط والحصار والتّهديد وتحطهم الكل تحت الصبّاط..

مخطّط الصهيونيّة أن يكون كيانها في الأرض المحتلّة هو سيّد الجميع الآمر النّاهي ويتحكّم في شعوب العالم وثرواتهم وهو وقت يحب يتمزّى عليهم بالفتفات ووقت مايحبّش يخلّيهم يشهقو ما يلحقو..

هالكيان اللقيط هو بالضبط نسخة من الدّجّال متاع آخر الزّمان الموصوف كما يُروى عن رسول الله عليه وعلى آله الصّلاة والسّلام: (كالغيث إستدبرته الرّيح، فيأتي على القوم فيدعوهم فيؤمنون به، ويستجيبون له، فيأمر السّماءَ فتُمطِر، والأرض فتُنبِت، فتروح عليهم سارحتُهم أطولَ ما كان ذُرَّاً، وأسبغه ضروعاً، وأمدّه خواصر، ثم يأتي القومَ فيدعوهم، فيردُّون عليه قولَه فينصرف عنهم، فيصبحون ممحلين ليس بأيديهم شيء من أحوالهم)..

هاكا علاش حتّى لو حزمة من الفلسطينيين والعرب والمسلمين إختارو يولّو أحباب وحلفاء لهالكيان الأخطبوطي فلازم بقيّة أحرار هالأمّة يصمدوا ويرابطوا واللي ينجّم يعمل حاجة يعملها واللي ماينجّمش يخلّي اللي ينجّم يعمل وما يحطلوش العصى في العجلة ويمشي جيل ويجي جيل لين يجي الجيل اللي يقدر يحقّق وعد الله في القضاء على هالشّيطان الأكبر وترتاح الإنسانيّة من شرّو.