قالّك تعرفش العلم ؟.

كتبت هذه التّدوينة بتاريخ 25 أفريل 2014

نحب ننصح سي الطّاهر هميلة باش يقرأ كتاب "الإنطلاقة التّدويريّة في نظريات الرّيادة القعوريّة" لعلّ يلقى فيه تفسير ودواء لحالتو المستعصيّة..

وإلاّ شنوّة معناها المستوطن في الكيّان الصّهيوني يكون صهيوني وعنصري مادامو وسط الكيان وكيف يسافر سايح يولّي إنسان ومن واجبنا نرحبو بيه ونقبلوه في بلادنا ؟؟ الحقيقة شئ كبير على طاسة مخّي..

زعمة الصّهيوني يتبربر مع البرورة ويتسقلم مع السّقلومة ويكون داخل الكيان كيف شارون وكيف يولّي سائح ويسيح تُبعث فيه روح الإنسانيّة ويصير حنيّن وإلاّ شنيّة الحكاية ؟؟

وين كنت يا سي الطّاهر ؟؟

وين كنت وقت كان شارون يستنّى فيك ثمنية سنين.. الظّاهر كان يتحمّل في الغبغوبة ووحوش الكيان وأملو فيك كبير باش تجيبو لتونس وتلهمو بإنسانيتك بالكش يفارق الدّنيا صافي دافي ويبعث من الصّالحين.

بالله ثمّاش واحد متعصّب ومتطرّف وعندو ساطور يجي يقيم عليّا الحد ويقصّلي هالسّبّابة لحّاس القصعة اللي زرّق وجهو باش إنت توصل للمجلس ؟؟

إنت تشخر يا سي الطّاهر وزادت عليك 100ـة بالبف..

قالّك يا سيدي بن سيدي ثمّة صهاينة يدافعو عالقضيّة الفلسطينيّة..

كيفاش تركب هاذي ؟؟ صهيوني عندو هويّة وباسبور الكيان ويرقد على أرض غاصبها وياكل من خيرات بلاد فاككها من صحابها.. ويدافع عليهم ؟؟

عجب... دا إنجليزي يا مرسي ؟؟ هاذا حد عقولكم ؟؟..

كانش وحسب نظريتك هاذا صهيوني خارق يسيح من غير ما يسافر.

ميزالت البهوميّة.