ماثمّة في الهم ماتختار.

 كتبت هذه التّدوينة بتاريخ 28 مارس 2014

كيف تحب تشكّك في مسألة إرفس في حلاّب مقعور.. ولا يهمّك.

ثمّة اللي يصدّق كلّ شئ..

وثمّة اللي يصدّق على خاطرو مصندق, حل الصندوق وحط ماتحب, مايرد شئ..

وثمّة اللي يصدّق من جهلو والطاسة الفارغة تحب شكون يعبيها..

لطفي العماري عمل إكّاكة..

حقدو عالثّورة مانيش عارف شنوّة أساسو.. كان في وقت بن علي مسكّر جلغتو وكيف ينطق يقول كل شئ إلاّ رأيو بصراحة.. وراه هراوة تنزل على قبّاعتو لوكان يفوت حدّو.

وجات الثّورة ردّتو موتور مزّوط إذا تخمر ماعاد شئ يوقّفو، يعبّر ويبعّر بكل حرّيّة.

مالا ليه الحقد ليه.

وهو على أساس متثقّف ياخي جي ماش يعماها ردّها كيف زرقاء اليمامة..

في تعليقو على أخت أصالة نصري اللي لبست كسوة الجيش وغناة لبشّار بينما أختها أصالة معارضة للنّظام: "هذا من بركات الرّبيع العربي.. الأخت تعادي أختها.. هذا الرّبيع مالا الخريف كيفاش ؟"..

قلتلكم الرّاجل متثقّف.

نسيت يا سي لطفي وقت الدّعوة الإسلامية كيفاش الولد عادى بوه والأخ عادى خوه في قريش..

تعرف علاش ؟..

على خاطر كيف الحق يتحط في الميزان العلاقات العائليّة ماعادش عندها وزن والحق يعلو ولا يعلى عليه..

ثمّ ياعبقري زمانك، علاش مُصر ومركّز على أنّ الرّبيع العربي هو السبب ؟..

هو الرّبيع العربي كان يصير لوكان ما ثمّاش حكّام ظلمة ؟

زعمة ظلم الحاكم ما عندوش دور ؟

ثمّ علاش ماتقولش اللي الرّبيع العربي كيف ما ردّك عبد وعطاك حرّيّة التّخمير وخلاّك تخرّج الـGـمّة اللي فيك هو نفسو اللي خلّانا نعرفو اللي أصالة نصري وأختها مختلفين في الرّأي (أنا مانقولش متعاديين) مادام قبل هالإختلاف ما يفوتش باب الدّار.

الحاصيلو.. هم يا سي لطفي، هم.. وماثمّة في الهم ماتختار..