الجماعة رْجعِّلهم شاهد العقل وعاملين فيها شُرفة وقالوها بصوت عالي قدّام القاصي والدّاني وكإنّوا عنترة بن شدّاد تبعث من جديد.
يا أمريكا لن تمرّي
يا أمريكا ولّي ولّي
أنا من رأيي موش وقتو هالكلام الصّعيب.. لوكان إستنّاو شويّة موش خير ؟
ناس قبل قالوا: "يا بابا هيّا نولّيو شرفة؟.. قالّو حتّى يموتو كبار الحومة"..
مالا.. ثمّة نظام تسلسل يلزم إحترامو ماكانش يكون "كلامك يا هذا في النّافخات زمرا"..
باهي، هاكم قلتوها اليوم وخرجتو حْضُبْ والقايلة فرشختّلكم صلاعيكم، لكن شكون مصدّقكم؟.. على شكون ماش يجد خرّافكم؟..
اللي شاف كيفاش خربتو البلاد وفلّستوها وخلّيتوها عالضّحضاح، ماش يصدّقكم؟
اللي شاف كيفاش كذبتو عليه وتاجرتو بكرامتو وقوتو، ماش يصدّقكم؟
اللي شاف كيفاش ردّيتو مجلس الأمّة كوري زوايل بأنانيّتكم وتبلصيمكم، ماش يصدّقكم؟
اللي شاف خنّاركم وفسادكم وبيعانكم للبلاد من أجل مصالحكم، ماش يصدّقكم؟
اللي شاف نفاقكم وترهدينكم، ماش يصدّقكم؟
اللي شاف وجوهكم حمارت وكروشكم تنفخت وكراهبكم تنعوشت ودياركم تقصّرت، ماش يصدّقكم؟
هكّاكا اليوم لا قام ولا دزّوه ولّيتو شرفة؟
لا حول ولا قوّة إلاّ بالله..
الحجرة الرّخام تذوب وأمثالكم عمرها ما إتّوب، والفحّام يعدّي عمرو مسوّد، وأخباركم مسجّلة مسوّدة ممدّدة لا تمحيها بروباغندا ولا تجوليغ ولوكان فيكم ذرّة شرف راكم لمّيتو بعضكم والشّكارة والبحر، وريح السّد تودّي ولا ترد.
فهمتو وإلاّ نلحّنهالكم؟..
ليست هناك تعليقات:
إرسال تعليق